Eras escòlas Calandretas que son escòlas associativas, laïcas, ar’escolaritat a gratís e ligadas ar’Educacion Nacionau (lei 1959 – lei d’especificitat deths establiments escolars). Desempuish era naishença dera permera Calandreta, a Pau, en 1980, eras Calandretas qu’eston tostemps arreconegudas per’Educacion Nacionau.

Totas eras escòlas Calandretas que fonccionan dab eth sosteng d’ua associacion de basa : er’Associacion Calandreta. Totas eras familhas de qui escolarisan eths loés mainats a Calandreta que son membres der’associacion. Ad’aquestes principaus associatius, que pòden ligar-se d’autas personas de qui n’an pas eths loés mainats a Calandreta, més, de qui sostenguen aquestas escòlas.

• Entaras familhas de calandrons (mainats escolarisats a Calandreta) er’adesion qu’ei trimestriau (trimèstres escolars) : qu’ei de 33 €.

• Entaths membres de qui sostenguen eth moviment, er’adesion qu’ei annuau : qu’ei de 25 €.

Er’Associacion Calandreta qu’elegueish a cada amassada generau annuau un conselh d’administracion (hargat essenciaument deths parents). Aqueste darrèr qu’elegueish un burèu. Eth conselh d’administracion que s’amassa, actuaument, tots eths permers dijaus de cada mes.

Er’Associacion Calandreta, associacion de basa, qu’ei activa. N’intervié pas ena pedagogia desvelopada per’escòla. Més, que velha ath arrespèct dera Carta deras Calandretas.

Er’Associacion Calandreta qu’organisa manifestacions entà finançar eths pòstes deth personau non-arregent, projèctes pedagogics e entà hèr coneisher er’escòla. Que sostié er’escòla enas suas caminadas administrativas dab :

• era municipalitat (atribucion deths locaus, botar en conformitat eths locaus, sòus der’escòla…)

• eth conselh Generau (atribucion de subvencions de qui ajudan ath fonccionar der’escòla…)

• eras Federacions Despartamentaus e Regionaus deras Calandretas

• era Confederacion deras Calandretas

• autes organismes

Arròtle deths parents

• • Eths parents ne son pas de simples « consomators » com en eth fonccionar deras escòlas classicas.

• • Eths parents que coneishen e qu’arrespèctan era Carta deras Calandretas.

• • Eths parents que son associats ar’organisacion e ath fonccionar der’escòla a travèrs er’associacion de basa.

• • Eths parents que son arresponsables dera qualitat der’escòla. Segon era loa disponibilitat e deras loas competenças, que son convidats a participar ar’administracion der’escòla en eth conselh d’administracion o deth burèu deths arrepresentants eleguits der’Associacion Calandreta : president, secretari, dinerèr…

• • Eths parents que son amiats a implicar-se en eth devenguer e en’organisasion der’escòla entà que cada mainat e posca caminar en ua escòla de qualitat.

• • Tots eths parents que son hòrtament convidats a investir-se en’organisacion de manifestacions (mercat de Nadau, bal, concèrt, vueita solèrs…) de qui permeten en partida ath finançament der’escòla a travès er’Associacion.